Աշխարհի տարբեր երկրներում մարդիկ տարբեր կերպ են դիմավորում Նոր տարին, Իսպանիայում գոյություն ունի մի յուրահատուկ ավանդույթ, որը կապված է խաղողի հետ: Ամեն տարի, դեկտեմբերի 31-ին, միլիոնավոր իսպանացիներ իրենց ընտանիքների և ընկերների հետ հավաքվում են ՝ կատարելու «Las doce uvas de la suerte» կամ «12 բախտի խաղողներ» կոչվող ծեսը:
Ավանդույթի համաձայն, յուրաքանչյուր ոք պետք է ուտի 12 խաղող՝ կեսգիշերվա վերջին 12 վայրկյանների ընթացքում: Ամեն խաղող խորհրդանշում է գալիք տարվա մեկ ամիսը, և հավատում են, որ դրանք հաջողաբար ուտելը կբերի հաջողություն:
Ավանդույթը սկիզբ է առել 19-րդ դարի վերջին՝ Մադրիդում: Այն արագորեն տարածվել է ողջ երկրով մեկ և այսօր դարձել է իսպանական մշակույթի անբաժանելի մասը: Ավելին, այս սովորույթը տարածվել է նաև Լատինական Ամերիկայի մի շարք երկրներում:
Խանութներում նախատոնական օրերին հատուկ փաթեթավորված 12 խաղողից բաղկացած տուփերը դառնում են ամենապահանջված ապրանքներից մեկը: Շատերը նախընտրում են սպիտակ, անկորիզ խաղողը, որը ավելի հեշտ է ուտել սահմանափակ ժամանակահատվածում: