Մետաբոլիկ համախտանիշը մի շարք վիճակների համակցություն է, որոնք մեծացնում են 2-րդ տիպի շաքարային դիաբետi, սրտանոթային հիվանդությունների և ինսուլտի ռիսկը։ Այս համախտանիշը ախտորոշվում է, երբ առկա են հետևյալ գործոններից երեքը կամ ավելին՝ մեծացած գոտկատեղ, տրիգլիցերիդների բարձր մակարդակ, խոլեստերինի ցածր մակարդակ, գլյուկոզայի բարձր մակարդակ քաղցած վիճակում և բարձր արյան ճնշում։
Ահա այն մրգերը, որոնք կօգնեն բարելավել վիճակը մետաբոլիկ համախտանիշի դեպքում.
-
Նուռ։ Հետազոտությունները ցույց են տալիս, որ այն դրական է ազդում արյան ճնշման, արյան մեջ շաքարի, խոլեստերինի և տրիգլիցերիդների մակարդակի վրա։ Դա պայմանավորված է նրանով, որ նուռը պարունակում է հակաօքսիդանտ և հակաբորբոքային հատկություններ ունեցող նյութեր։ Նուռը նաև նպաստում է օգտակար Akkermansia աղիքային բակտերիաների աճին, որոնք աջակցում են նյութափոխանակությանը, առողջ քաշին, բարելավում ինքնազգացողությունը և ամրապնդում իմունիտետը։
-
Ձմերուկ։ Ըստ հետազոտությունների՝ մարդիկ, ովքեր չորս շաբաթ շարունակ օրական երկու բաժին ձմերուկ են կերել, իրենց ավելի քիչ քաղցած և ավելի հագեցած են զգացել, քան նրանք, ովքեր նույնքան կալորիա են ստացել ցածր յուղայնությամբ թխվածքաբլիթներից։ Նրանց մոտ նաև նկատվել է արյան ճնշման և քաշի նվազում։
-
Մոշ։ Մոշը պարունակում է կալիում, կալցիում և մագնեզիում, որոնք նպաստում են արյան ճնշման իջեցմանը։ Այս հատապտուղը նաև հարուստ է մանրաթելերով։
-
Ցիտրուսային մրգեր։ Դրանք պարունակում են կալիում, վիտամին C և մանրաթելեր։ Ցիտրուսային մրգերը ներառված են նաև DASH դիետայում, որը խորհուրդ է տրվում հիպերտոնիայի բուժման համար։
-
Խաղող։ Հետազոտությունները ցույց են տալիս, որ խաղողը նվազեցնում է արյան ճնշումը, տրիգլիցերիդների, ընդհանուր խոլեստերինի մակարդակը։ Ինչպես նուռը, այն նույնպես նպաստում է օգտակար Akkermansia աղիքային բակտերիաների աճին։
-
Խնձոր։ Դրանք հարուստ են մանրաթելերով, իսկ կեղևը՝ հակաօքսիդանտներով, որոնք օգնում են նվազեցնել մետաբոլիկ համախտանիշի զարգացման ռիսկի գործոնները։
Զգուշացում․ Լրատվական բնույթի նյութերը չպետք է հավասարեցնել բժշկի նշանակումներին։ Որևէ որոշում կայացնելուց առաջ խորհրդակցեք մասնագետի հետ։