Նույնիսկ ամեն օր փոքր քայլերը կարող են օգնել բարելավել արյան գլյուկոզայի ցուցանիշները, եթե դուք շաքարային դիաբետ ունեք։ Ահա, թե ինչի վրա են խորհուրդ տալիս կենտրոնանալ դիետոլոգները․
-
Սկսեք ուտելիքը ոչ օսլա պարունակող բանջարեղենից։ Որոշ հետազոտություններ ցույց են տալիս, որ ուտելու հերթականությունը կարող է ազդել արյան շաքարի մակարդակի վրա։ Բջջանյութով հարուստ սնունդը (ոչ օսլայով բանջարեղեն և այլն) ածխաջրերով հարուստ կերակուրից առաջ դանդաղեցնում է ստամոքսի դատարկման արագությունը։ Սա կարող է մեղմացնել արյան շաքարի բարձրացումը։ Նույն ազդեցությունը կարող է ունենալ նաև նախապես սպիտակուց կամ ճարպ օգտագործելը։ Հետևաբար՝ սկսեք բանջարեղենից, ապա անցեք սպիտակուցի, և միայն հետո՝ ածխաջրերի։
-
Լավ ծամեք ուտելիքը։ Հետազոտություններից մեկը ցույց է տվել, որ արագ ուտելու սովորությունը կարող է բարձրացնել արյան շաքարը։
-
Կանոնավոր չափեք արյան շաքարը։ Դա կարևոր գործոն է այն նորմայի սահմաններում պահելու համար։ Ավելի լավ է դա անել ամեն օր նույն ժամին։
-
Խոր շունչ քաշեք։ Սթրեսի ժամանակ կորտիզոլ հորմոնի մակարդակը բարձրանում է, ինչի հետևանքով կարող է բարձրանալ նաև արյան շաքարը։ Դրան օգնում է խոր շնչառության պրակտիկան։ Դիետոլոգ Քեյթլին Հիպպլին խորհուրդ է տալիս «քառակուսի շնչառության» մեթոդը․ քաշեք օդը 4 վայրկյանում, պահեք 4 վայրկյան, արտաշնչեք 4 վայրկյանում և նորից պահեք 4 վայրկյան։
-
Քայլեք սնվելուց հետո։ Գիտական ուսումնասիրությունները ցույց են տվել, որ ընդամենը 20 րոպեանոց քայլքը ուտելուց հետո նվազեցնում է արյան գլյուկոզան։ Ավելի լավ արդյունքի համար քայլեք մաքուր օդում։
-
Միացրեք ածխաջրերը սպիտակուցի հետ։ Սա դանդաղեցնում է ածխաջրերի վերածումը գլյուկոզայի, կայունացնում է արյան շաքարը և օգնում է երկար ժամանակ չզգալ սով։
⚠️ Նյութը տեղեկատվական բնույթ ունի և չի կարող փոխարինել բժշկի խորհրդին։ Սննդակարգում կամ բուժման մեջ փոփոխություն անելուց առաջ անպայման խորհրդակցեք մասնագետի հետ։