Amazon-ը պատրաստվում է ձեռք բերել Bee ստարտափը, որը ստեղծում է սարք և հավելված՝ Apple Watch-ի համար։ Սարքը ձայնագրում է այն ամենը, ինչ ասում է օգտագործողը։ Գործարքը դեռ չի ավարտվել, իսկ պայմանները չեն հրապարակվում։ Bee-ի բոլոր աշխատակիցներին առաջարկվել է միանալ Amazon-ին։
Bee-ն իր սարքը դիրքավորում է որպես արհեստական բանականությամբ անձնական օգնական, որը սովորում է՝ լսելով օգտատիրոջ բոլոր զրույցներն ու գործողությունները: Սարքն ունի ձայնագրությունը անջատելու կոճակ, սակայն հիմնականում աշխատում է «լսելու» ռեժիմում։ Հավելվածը կարող է ամփոփել օրվա իրադարձությունները, հիշեցնել անելիքները և հիշեցնել կարևոր խոսակցությունները։
Սակայն, մշտապես «լսող» այս սարքը կրկին բարձրացնում է գաղտնիության հետ կապված հարցեր։ Amazon-ը նման խնդիրների արդեն բախվել է մի քանի տարի առաջ, երբ պարզվեց, որ իր աշխատակիցները կարող էին լսել Alexa-ից ձայնագրությունները, այդ թվում՝ պատահական ձայնագրված խոսակցությունները։