Կրիպտոարժույթի շուկան զգալի անկում է գրանցել հունվարի 7-ին ԱՄՆ մակրոտնտեսական ցուցանիշների հրապարակումից հետո։ Բիթքոինի արժեքն առաջին անգամ վերջին շրջանում իջավ 100,000 դոլարի սահմանագծից ցածր՝ գրանցելով ավելի քան 5% անկում։
Ըստ Presto Research-ի վերլուծաբանների, անկման հիմնական պատճառը ներդրողների մտահոգություններն են, որոնք կապված են ինֆլյացիայի և ԱՄՆ Դաշնային պահուստային համակարգի ( Federal Reserve Board ) բարձր տոկոսադրույքների հետ։
Շուկայի անկումը չի սահմանափակվել միայն բիթքոինով։ Ethereum-ը գրանցել է ավելի զգալի՝ 8%-ից ավել անկում։ Մյուս կրիպտոարժույթները ևս հայտնվել են ճնշման տակ․ Hyperliquid-ը, Gala-ն և Celestia-ն կորցրել են իրենց արժեքի մոտ 16%-ը։
Շուկայի կտրուկ անկման հետևանքով լիկվիդացվել են շուրջ 700 միլիոն դոլարի առևտրային պոզիցիաներ, որից 270 միլիոնը բաժին է ընկել բիթքոինին և Ethereum-ին
BTC Markets-ի վերլուծաբան Ռեյչել Լուկասը նշում է, որ ԱՄՆ-ից ստացված տնտեսական տվյալները ստիպել են թրեյդերներին վերանայել իրենց սպասումները՝ կապված FRB-ի դրամավարկային քաղաքականության հետ։
Abra ընկերության առևտրային բաժնի ղեկավար Բոբ Ուոլդենը հավելում է, որ ԱՄՆ պետական պարտատոմսերի եկամտաբերության աճը լրացուցիչ զգուշավորություն է մտցրել ներդրողների շրջանում բիթքոինի նկատմամբ։
Այս իրադարձությունները ցույց են տալիս, որ կրիպտոարժույթների շուկան շարունակում է մնալ խիստ զգայուն ավանդական ֆինանսական շուկաների և մակրոտնտեսական գործոնների նկատմամբ։