Netflix ընկերությունը հրապարակել է արհեստական բանականության (ԱԲ) օգտագործման իր կանոնները՝ բաժանելով դրանք ցածր ռիսկի և բարձր ռիսկի սցենարների։ Փաստաթուղթը հասանելի է Partner Help Center բաժնում։
Ընկերությունը կարևորում է անձնական տվյալների պաշտպանությունը, հեղինակային իրավունքի պահպանումը, դերասանների և անձնակազմի նկատմամբ հարգանքը, ինչպես նաև հանդիսատեսի վստահության պահպանումը։ Մասնավորապես, արգելվում է ԱԲ-ն օգտագործել «նոր դերասանական կատարումներ ստեղծելու» կամ «համաձայնագրերով պաշտպանված աշխատանքը առանց մասնակիցների համաձայնության փոխարինելու» համար։
Netflix-ը նաև պահանջում է, որ արհեստական բանականության գործիքները չուսուցանվեն ընկերության արտադրական տվյալների հիման վրա, իսկ ստեղծված նյութերը մնան ժամանակավոր և վերջնական արտադրանքի մեջ չընդգրկվեն առանց ստուգման։ Բարձր ռիսկային դեպքերում ԱԲ-ի օգտագործումը պետք է համաձայնեցվի ավելի բարձր մակարդակով։
Նշենք, որ Netflix-ն արդեն իսկ քննադատության էր արժանացել արհեստական բանականության կիրառման համար։ Օրինակ, «What Jennifer Did» վավերագրական ֆիլմում և «The Eternaut» սերիալում վիզուալ էֆեկտների (VFX) մի մասը փոխարինվել էր գեներատիվ գրաֆիկայով։