Էլեկտրական մեքենաների սպասարկման ծախսերը զգալիորեն ավելի ցածր են բենզինային շարժիչով մեքենաների համեմատ, և դրա համար կան մի շարք օբյեկտիվ պատճառներ: Ամենակարևոր առավելությունը շարժիչի կառուցվածքն է:
Ի տարբերություն ներքին այրման շարժիչների, որոնք ունեն հարյուրավոր շարժվող մասեր, էլեկտրական շարժիչը շատ ավելի պարզ է և հուսալի: Այստեղ չկա ոչ յուղման համակարգ, ոչ վառելիքի մատուցման և արտանետման համակարգեր, ինչը զգալիորեն նվազեցնում է սպասարկման ծախսերը:
Հատկանշական է նաև արգելակման համակարգի առավելությունը: Էլեկտրական մեքենաներն օգտագործում են ռեգեներատիվ արգելակման տեխնոլոգիա, որի շնորհիվ արգելակման սկավառակները ենթարկվում են ավելի քիչ մաշվածության: Սա նշանակում է, որ դրանց փոխարինման անհրաժեշտությունը ծագում է շատ ավելի ուշ:
Սովորական մեքենաների սեփականատերերը լավ գիտեն, թե տարեկան որքան գումար է ծախսվում յուղի փոխման, տարբեր ֆիլտրերի փոխարինման և շարժափոկերի ( Приводной ремень ) սպասարկման վրա: Միայն յուղի պարբերական փոխումը տարեկան կարող է արժենալ 20-30 հազար դրամ: Էլեկտրական մեքենաների դեպքում այս բոլոր ծախսերը պարզապես բացակայում են:
Պարբերական սպասարկումը էլեկտրական մեքենաների դեպքում սահմանափակվում է հիմնականում անվադողերի ռոտացիայով, սառնազդակի և արգելակման հեղուկի մակարդակների ստուգմամբ, ինչպես նաև սրահի ֆիլտրի պարբերական փոխարինմամբ: Եթե փորձենք թվերով ներկայացնել, ապա միջին վիճակագրական բենզինային մեքենայի տարեկան սպասարկումը կարող է արժենալ 150-200 հազար դրամ, մինչդեռ էլեկտրականի դեպքում այդ թիվը հազիվ հասնում է 80-100 հազար դրամի:
Սակայն անհրաժեշտ է նշել նաև մեկ կարևոր նրբություն:
Էլեկտրական մեքենաների սեփականատերերը պետք է հաշվի առնեն, որ մոտավորապես 8-10 տարի հետո կարող է առաջանալ մարտկոցի փոխարինման անհրաժեշտություն: Սա բավական թանկարժեք գործընթաց է, որը կախված մոդելից կարող է արժենալ 3-5 միլիոն դրամ: Այնուամենայնիվ, եթե հաշվի առնենք, որ մինչ այդ տասը տարիների ընթացքում սեփականատերը զգալի խնայողություններ է անում ընթացիկ սպասարկման վրա, ապա ընդհանուր պատկերը շարունակում է մնալ դրական:
Ամփոփելով կարող ենք ասել, որ էլեկտրական մեքենաների տեխնիկական սպասարկումն իրոք ավելի էժան է և պարզ: Սա հատկապես կարևոր է այն մարդկանց համար, ովքեր ցանկանում են խուսափել ավանդական մեքենաների հաճախակի սպասարկման հետ կապված անհարմարություններից և ծախսերից: