Ոչ ԵԱՏՄ տարածքից ՀՀ ժամանակավոր ներմուծված մեքենան շահագործման նպատակով անդամ պետության քաղաքացու հանձնելը՝ առանց մաքսային մարմնից գրավոր թույլտվության, նախատեսում է տուգանք տվյալ տրանսպորտային միջոցների մաքսային արժեքի 20 տոկոսի չափով: Այդ մասին հիշեցնում և զգուշացնում է ՀՀ պետական եկամուտների կոմիտեն։
ՊԵԿ–ից հիշեցնում են, որ օտարերկրյա, ինչպես նաև ԵԱՏՄ անդամ պետությունների ֆիզիկական անձանց կողմից միության անդամ չհանդիսացող պետությունում գրանցված մեքենաների ժամանակավոր ներմուծումը ԵԱՏՄ, այս դեպքում՝ Հայաստան, թույլատրվում է ոչ ավելի, քան 1 տարի ժամկետով:
«Այսպես կոչված, միության անձը ժամանակավորապես ներմուծվող տրանսպորտային միջոցի համար առաջացող մաքսատուրքերի և հարկերի վճարման պարտավորությունը պետք է ապահովի միշտ։ Իսկ «օտարերկրյա անձանց» համար 1-ին տրանսպորտային միջոցի ներմուծման համար այդպիսի պահանջ չի սահմանվում, սակայն նրանց համար այդ պարտավորությունը կառաջանա, երբ առանց այդ տրանսպորտային միջոցը վերաարտահանելու՝ ժամանակավորապես կներմուծի 2–րդ և յուրաքանչյուր հաջորդ տրանսպորտային միջոցը»,– ասված է ՊԵԿ հաղորդագրության մեջ։
Կոմիտեից նշում են, որ լինում են դեպքեր, երբ օտարերկրյա պետությունում գրանցված տրանսպորտային միջոցը ներմուծվելով օտարերկրյա անձի կողմից` շահագործման նպատակով հանձնվում է, օրինակ, ՀՀ-ում մշտական բնակության վայր ունեցող քաղաքացիներին և այդ անձը լքում երկիրը` այդպիսով շրջանցելով վճարումն ապահովելու պահանջը:ՊԵԿ–ը հորդորում է քաղաքացիներին զերծ մնալ նման վարքագծից, քանի որ ՀՀ սահմանը հատելու պահից այդպիսի տրանսպորտային միջոցը գտնվում է մաքսային հսկողության ներքո և ՀՀ-ում պետք է գտնվի ներմուծողի փաստացի տիրապետման և օգտագործման տակ ու չի կարող փոխանցվել այլ անձի: